Fiksjon

Regi: Jonas Åkerlund

Lords of Chaos

Med: Øystein «Euronymus» Aarseth, varg vikernes mfl.

Då ekte norsk svartmetall blei «oppfunne» og Øystein «Euronymus» Aarseth med bandet Mayhem tok til å gjere seg gjeldande, steig ein ung bergensar inn på scenen og gjorde svartmetall til noko meir enn berre musikk. Bak ei sjuk blanding av heidenskap, satanisme og annan djevelskap gjekk Kristian Vikernes, alias Varg Vikernes, alias Greven, laus på alt som representerte kyrkjelege og andre autoritetar.

Kyrkjebrann og drap

Det førte til fleire kyrkjebrannar og to drap før han blei stoppa. Det siste drapsofferet var nettopp Aarseth, og originalt nok har regissøren gjort han til forteljar og hovudperson i filmen.

Svensken Jonas Åkerlund, som er kjend for å lage musikkvideoar for dei store verdsstjernene, har teke for seg den galskapen som Vikernes, med halvhjarta bidrag frå Aarseth, sette ut i livet.

Skremmande bilete

Filmen er ei blanding av dokumentar og fiksjon og eit skremmande bilete av det som gjekk for seg i nokre forvirra hovud. Unggutar som knapt visste kva dei gjorde, og kvifor, blir skildra med ein villskap og i scener så blodige at filmen hadde tent på mindre kraftig effektbruk. Euronymus blir ein interessant figur i kraft av at han er langt sterkare i ord enn i handling, men gjerne tek æra for alt Greven gjer. Dei andre i bandet blir stort sett reduserte til redde medløparar, og det var dei kanskje òg.

Jan H. Landro