Innvandrarsuksess

Det er interessant å sjå korleis innvandrarar gjer seg gjeldande i norsk filmproduksjon. Prisar vinn dei òg. Med Nowhere to Hide fekk den kurdisk-norske regissøren Zaradasht Ahmed BIFF-prisen for beste dokumentarfilm. Filmen skildrar nokre av etterverknadene av USAs tilbaketrekking frå Irak, mellom anna gjennom lagnaden til krigsramma menneske på eit sjukehus.

Prisen til beste norske kortfilm gjekk til No Man is an Island, regissert og produsert av Ali Parandian. Filmen fortel om tre kameratar som blir oppsøkte av ein mann som kallar seg Jesus, og som formidlar ein bodskap om kjærleik, forsoning og brorskap.

Treffer dei unge

BIFF har kvart år ein omfattande programpakke med både spele- og dokumentarfilmar for elevar i ungdomsskulen og den vidaregåande skulen. I god tid før festivalstart får skulane informasjon om filmane som er utvalde for skuleprogrammet. Dei får også spesiallaga materiell som skal førebu elevane på det dei får sjå.

Filmane blir viste i skuletida under festivalen, og etter visninga blir det i somme høve dialog med filmskaparane, der elevane kan komme med eigne synspunkt, spørsmål og kommentarar til filmen. At tilbodet er populært både for elevar og lærarar, går fram av besøkstala. I fjor hadde BIFF 30.000 elevbesøk, i år steig det til om lag 32.000.