Action/eventyr

Regi: Joachim Rønning og Espen Sandberg

Pirates of the Caribbean – Salazar’s Revenge (orig. tittel: Pirates of the Caribbean – Dead Men Tell No Tales)

Med: Johnny Depp, Geoffrey Rush, Javier Bardem

Kaptein Jack Sparrow er stasjonert på den karibiske øya Saint Martin og må avbryta bankranarkarrieren for å ta eit oppgjer med fortida og gjenferdkapteinen Salazar. Unge Henry og den heksedømde astronomvenleiken Carina treng Sparrow for å finna treforken til Poseidon, inkje mindre, for å heva forbanningane som kviler over havet og far til Henry.

Johnnyen

For femte gong splittar kaptein Jack Sparrow sine bramsegl og lossar kaggar med rom og ho ho ho. Men er det noko å le av? Johnny Depps sterkt overdrivne karikatur av ein drukkenbolt av det gode, gamle slaget burde ha mønstra av for lenge sidan. Han har omtrent like mykje snert som Jeppe på Bjerget i ei middels bra skuleteateroppsetjing. Han har ikkje noko hjelp i manus heller, noko som berre understrekar formelpreget på filmen totalt – kanskje ein tanke meir påkosta enn Bud Spencer-filmane på 80-talet, men med like mykje tyngde, humor og originalitet.

Poopcorn

Det er ganske imponerande at gode skodespelarar som Geoffrey Rush og Javier Bardem har lyst til å spela i Pirates-filmane. Paul McCartney har takka ja til ei minirolle som onkelen til Jack – kanskje han òg vil vera litt slemming sidan Depp har basert Sparrow på Keith Richards? Hollywood kan éin ting: laga popkornunderhaldning til dei store massane. Budsjettet vert brukt på spesialeffektar og marknadsføring, ikkje manus og nyskaping. Men dei kunne vel i det minste ha spart litt på ikkje å hyra Johnny Depp?!

Brit Aksnes

Brit Aksnes er frilans kulturarbeidar og fast filmmeldar i Dag og Tid.