Geir Brungot, Stein Koksvik og Olav Ringdal:
Tilbud, anslag, en suksesshistorie

Kristiansand Kunsthall

6. april–26. mai

Ei leikande, myldrande utstilling der installasjon, kunstfotografi, teikning og animasjon vert sett i lys av måleritradisjonen.

Violet Dennison: Tell Me How To Feel

Kunsthall Stavanger

13. april–2. juni

Amerikanske Violet Dennison synleggjer kor sårbare menneska er i møte med datasystem. I aukande grad vert kvardagen styrt av løynde algoritmar i digitale system. Ho har avdekt og konkretisert den usynlege informasjonen i noko som kan liknast med digitale sjølvportrett. Her er også handfaste gjenstandar utførte i knyteteknikken makramé, eit sjølvportrett gjennom tidkrevjande kunstnarleg handverk.

Van Gogh Alive

Hadeland Glassverk

11. mai–18. august

I den rikhaldige van Gogh-utstillinga vert meir enn 3000 bilete projiserte på veggar, tak og golv. Utan høve til å sjå eitt einaste originalverk misser ein opplevinga av det stofflege, som er noko av det mest interessante ved måleria til den nederlandske kunstnaren. Til gjengjeld kjem ein nær innpå detaljar i måleri og teikningar. Ein får også høve til å sjå bilete og filmar av inspirasjonskjeldene til kunstnaren. Fleire av veggane er interaktive, såleis kan publikum styre delar av opplevingane.

Bernt Tunold:
Ein eld som aldri slokna

Sogn og Fjordane Kunstmuseum, Førde

27. april–18. august

Landskapsmålaren Bernt Tunold (1877–1946) skildra det vestlandske gråvêret i saftige fargar. I dei detaljrike interiørbileta og stillebena gir kunstnaren innsyn i regionalt levesett, kultur og skikkar.

Lee Miller: War and Fashion

Preuss Museum, Horten

7. april–8. september

Amerikanske Lee Miller er mest kjend som den vene modellen for surrealistiske kunstnarar, og som krigskorrespondenten som dokumenterte så vel konsentrasjonsleirane til nazistane som frigjeringa av Paris i 1944.

I tillegg til krigsfotografia får vi innblikk i ein omfattande produksjon av motefotografi. Også her var Miller ein pioner med eit djervt blikk.