Hvitt lerret, ubeskrevet blad

Galleri Nord-Norge, Harstad

10. februar–13. mars

Som tenåring vart Herleik Kristiansen (f. 1947) send til Trastad Gård/ Nord-Norges Åndssvakehjem, diagnostisert som «ikke opplæringsdyktig». Den skjemmande merkelappen gjorde han raskt til skamme. Ved Trastad fekk han grundig opplæring i ulike kunstnarlege teknikkar, og han vart etter kvart ein anerkjend grafikar og keramikar. Han er vår best kjende outsiderkunstnar, altså ein som står utanfor samfunnet. Så kan ein reflektere over bruken av eit slikt omgrep medan ein fordjupar seg i denne omfattande utstillinga. Ho viser eit rikhaldig og spennande kunstnarskap som sprengjer dei fleste kategoriar. Utstillinga viser også verk av Børge Olufsen, Jardar Lunde og Arnold Johansen.

Vestlandsutstillingen 22 – 100 år

Haugesund kunstforening

11. februar–13. mars

Turnéstart av den juryerte utstillinga med tilknyting til Vestlandet. Utstillinga skal seinare visast i Ålesund, Øystese, Stavanger, Førde og Bergen. I samband med hundreårsmarkeringa skal det i år visast fram eit stadspesifikt kunstverk for kvar av visingsstadene.

I Haugesund er Mathijs van Geest invitert til å lage eit nytt kunstverk i byrommet. Han har utvikla ein ny font som publikum kan laste ned, i tillegg har kunstnaren laga skulpturelle versjonar av bokstavane, som okkuperer benker og eit stort banner på fasaden til Karmsund folkemuseum.

Sigve Knutson og Jane Hupe

Nils Aas Kunstverksted, Inderøy

5. februar–17. april

Organiske og uventa utformingar i tre og trykk av Sigve Knutson og abstrakte tresnitt av Jane Hupe.

David Edward Allen. Nightshade

Kongsvinger kunstforening

5. februar–6. mars

Den Berlin-baserte kunstnaren viser ein serie mørke, stemningsfulle måleri og eit lydverk. I dei mørke flatene skimtar vi stiliserte skoglandskap, medan vi lyttar til lydopptak frå skogen som synleggjer kor skjerpa høyrsla vert når det er mørkt. Om natta får den elles trygge skogen noko mystisk og dragande over seg, så vel som noko skremmande og fråstøytande.

File Under Freedom

Bergen Kunsthall

5. februar–27. mars

Gjennom ei frodig kryssing av jazzmusikk og visuelle kunstuttrykk behandlar utstillinga temaet improvisasjon og fridommen som ligg i kunstnarleg utforsking. Her møter vi eit mangfald av nasjonale og internasjonale kunstuttrykk, i form av nyproduserte verk, sjeldan viste historiske arbeid og arkivmateriale.