Ann Kristin Aas:

A Shallow Depth of Field

Fredrikstad Kunstforening

23. april–14. mai.

Kunstnaren har gjort eit rom i kunstforeininga om til forundringskabinett, også utanfor bygget er det sett opp verk. Her heng skulpturelle objekt og installasjonar tett i tett på veggane. Verka er baserte på naturmateriale og gjenstandar ho har funne på bruktmarknader og i kjellarar, hagar, grøftekantar, skogen og strandkanten.

Masterutstillingen 2022: Picnic

Bergen Kunsthall

8. april–8. mai

Kvar vår er kunsthallen vertskap for avgangsutstillinga frå Kunstakademiet. I år viser 27 kunstnarar frå 11 land arbeid både i Kunsthallen og i parken utanfor. Vi vert inviterte til ein piknik som bognar av verk i alle former: installasjon, måleri, skulptur, instruksjonstekst, video, foto, lydverk, opplesing og performance, i tillegg til terapeutiske øvingar og happeningar i form av såkalla «flyktige gester i det offentlige rom», og endåtil ein musikal.

Maiken Stene:

Via Norske fjell del 4

Nordnorsk Kunstnersenter, Svolvær 2. april–5. juni

Utstillinga viser fjerde del av eit langvarig prosjekt der kunstnaren set sine eigne personlege forståingar av landskap opp mot dei nasjonale kunsthistoriske og geologiske samanhengar. Gjennom måleri, video, dokumentar, tekst, foredrag og samtale viser ho fram korleis den etablerte historiske framstillinga av norsk natur påverkar det forholdet vi har til naturen i dag. I denne utstillinga tek ho føre seg fjella i Lofoten.

Gunnhild Uddu Ystad / Kristine Roald Sandøy:

Djupe andedrag, indre kraft

Nils Aas Kunstverksted, Inderøy

30. april–12. juni

Gunnhild Uddu Ystad viser ein serie teikningar av skog og landskap i grånyansar, med broderte linjer og former. Ho eksperimenterer med ulike materiale og teknikkar og skaper ei samansmelting mellom teikning, relieff og installasjon

Kristine Roald Sandøy har balanse og gravitasjon som grunnleggande element. På poetisk vis utforskar ho korleis materiala møter omgjevnadane så vel som menneskekroppen.

Aslaug Magdalena Juliussen, Marita Isobel Solberg og Trond Ansten:

Tregreiner

Samisk senter for samtidskunst, Karasjok

17. februar–8. mai

For å komme seg inn på museet går ein gjennom ei diger rypesnare, ein installasjon av Trond Ansten. I utstillingssalane viser dei tre kunstnarane samtidskunst basert på samiske, kvenske og nordiske handverkstradisjonar og naturbasert kunnskap. På ulike måtar tematiserer kunstnarane kropp og helse, heilskap og utnytting av ressursane. Kva finst av gløymd kunnskap som kan vise veg i dag?