Ullinsvin

Anna Marie Sigmond Gudmundsdottir:

Homo Gudbrandalus

Låven

Fellesutstilling med 26 kunstnarar:

HamsunFantasier

Galleri Ullinsvin

Rakel Onsum Berg og Trygve Haakenstad:

Vevkunst i møte med måleri

Fjøset, arr. Gudbrandsdalsmusea
5. juni–5. september

Galleri Ullinsvin opna hausten 2019 som del av den gamle prestegarden Ullinsvin, som ligg vakkert til med utsyn over Vågå sentrum.

Det er sjeldan store vyar fell saman med pengesummar i same format slik vi ser her. Gjennom eit omfattande søknadsarbeid og også store pengegåver er det bygd eit digert moderne galleri, med eit stort magasin. I tillegg vert store og skiftande utstillingar viste i fjøs og løe.

Eit godt samarbeid

Det er interessant korleis dei har lukkast med å knyte saman garden som eit kraftsenter av kunst, kultur og handverk på prestegarden. Ullinsvin Drift AS er ansvarleg for drifta av galleri og kafé, Opplysningsvesenets fond eig grunnen, og Vågå historielag eig bygningane og driftar den vakre prestegardshagen. Gudbrandsdalsmusea bidreg med skiftande utstillingar, stiftelsen Norsk Kulturarv og Vågå Husflidslag med aktivitetar.

Vågå har vore ein sentral stad gjennom historia og er ikkje ukjend med kunstmøte. Her har mange kunstnarar arbeidd, og for nokre år sidan slo kunstnaren Kjell Erik Killi-Olsen seg ned her. Gjennom tretti år har hobbyfotografar vore på kurs med fotografen Morten Krogvold i bygda. Opningsutstillinga i 2019 på Ullinsvin var også med Morten Krogvold.

Homo Gudbrandalus

Denne sommaren kan vi sjå tre utstillingar. Hovudutstillinga er i Løa. Dette er Homo Gudbrandalus, med verk utarbeidde særskilt til Løa på Ullinsvin. Kunstnaren er Anna Marie Sigmond Gudmundsdottir (f. 1974), som har stilt ut ved prestisjefylte mønstringar i Noreg så vel som i utlandet dei seinare åra. Denne gongen tek ho utgangspunkt i sine ti år som kunstnar i Gudbrandsdalen. Utstillinga er kuratert av Anniken Storhaug.

Her vert digre måleri hengde opp på bjelkane i løa. Verka er måla på lerret, ikkje spente opp, noko som fungerer godt på ein røff utstillingsstad som dette, gjennom glipene i det lafta tømmeret ser vi landskapet utanfor. Dei svære formata kler staden. Verka er heftige fargeeksplosjonar i abstrakte komposisjonar. Lange dirrande linjer i svart fyller formata, som enorme nærbilde av fingeravtrykk, spora ein set etter seg, eller dei spora ein finn etter andre.

Verka er mektige å sjå på, men med noko sjenerande bruk av gullmåling, eit materiale som er særs vanskeleg å lukkast med i måleri.

Her er også fleire teikningar i små format. Den tandre linjeføringa konkurrerer hardt om merksemda omkransa av grove, lafta tømmerveggar. Verka krev såleis skjerpa konsentrasjon av publikum, som vert lønt med ei overveldande oppleving av kontrastar mellom dei stillferdige, stramme komposisjonane og dei røffe omgjevnadene dei vert viste i.

Vevkunst i fjøset

Utstillinga i fjøset viser åtte vevnader laga av Rakel Onsum Berg (1916–2001), som gjennom 40 år samarbeidde med målaren Trygve Håkenstad (1913–1993) frå Vågå. I tillegg er det stilt ut måleri og kartongar til vevnadene av Håkenstad, og på fjøstrevet er veven til Berg sett opp saman med plantefarga garn. Utstillinga er laga av Gudbrandsdalsmusea.

Rakel Onsum Berg hadde base på Dovre i Gudbrandsdalen og var ein sentral biletvevar som i dag er nesten gløymd. Det er særs viktig at eit senter som dette løftar kunstnarskapet hennar fram i lyset med ei profesjonelt montert utstilling med grundige tekstar. Vevnadene til Berg er på sitt beste stramme i komposisjonen, med klåre og harmoniske fargeklangar.

HamsunFantasier

Det langstrakte galleribygget Ullinsvin er fylt med ei fellesutstilling med åtti verk av heile 26 norske kunstnarar. HamsunFantasier er sett saman av KulturKonsept ved Kristin Jordfald. Dette utstillingskonseptet vart første gong vist ved Nasjonalbiblioteket i Oslo, som utstilling og bok i samband med 150-årsdagen til Knut Hamsun i 2009. Seinare på året vart utstillinga vist i større format ved Trondheim Kunstmuseum.

I Ullinsvin er konseptet vidareutvikla med fleire nyare verk, og andre kunstnarar har kome til. Det er stor variasjon i medium, uttrykk og formspråk. Verka spenner frå måleri, grafikk, teikning, keramikk, glas og skulptur til tekstil og installasjon.

Arbeida er plukka ut for både å samsvare og å utfordre kjernetemaa i forfattarskapet til Hamsun. Her finn vi mellom anna ei underfundig samanstilling av to figurative skulpturar. Treskulpturen «Hamsuns røde løper» av Istvan Lisztes er lagd rett på golvet utan sokkel. Bronseskulpturen «Knut Hamsun» av Skule Waksvik er plassert ved sida av, slik at løparen ikkje kan rullast ut.

Forventingar

Sjølve galleribygget er stort og lyst, eit langstrekt rom med innebygde lettveggar og eit minigalleri. Lyssetjinga er fleksibel, det er høgt under taket, og eg er svært forventningsfull med tanke på kva som vil visast i åra framover, her så vel som i dei andre bygga på Ullinsvin.

Galleriet, saman med den historiske prestegardshagen og sjølve prestegarden med 13 velhaldne bygningar, gjer eit besøk på Ullinsvin til ei heilskapleg oppleving. Medan meir tradisjonelle utstillingsstadar berre gir føde til auga, får du her metta alle fem sansar.

Eva Furseth