Mange kunstnarar har fanga opp likskapane mellom desse nye plakatane og propaganda frå krigen og laga sine eigne versjonar. Eit eksempel er det grafiske verket «Reality Got You Down? Why Not Try a Conspiracy Theory?» av Fernando Reza. Han har teke utgangspunkt i propagandaplakaten «He’s Watching You» (1942) av amerikanaren Glenn Grohe. Under ein karakteristisk tysk hjelm gløder eit par auge mot oss. Store delar av propagandaen frå andre verdskrig handla nettopp om at du må passe munnen din, kven som helst kan vere spion.

Hemmeleg informasjon kan minne om smitte som spreier dødelege konsekvensar.

Med enkle grep har Reza omgjort den ikoniske plakaten frå 1942 til ei latterleggjering av ein av dei mange konspirasjonsteoriane som florerer for tida. Krigshjelmen er erstatta med ein hatt av aluminiumsfolie, og han har teikna inn eit fly som slepper ut virus som vert aktivert av 5G-nettet. Her tek kunstnaren tak i ein reell situasjon i samtida: Fleire stader har 5G-master blir øydelagde av sinte og redde menneske som faktisk trur på slike bisarre påstandar. Kaotiske tider gir grobotn for både skadelege konspirasjonsteoriar og slagferdige motsvar frå kunstnarar.

Eva Furseth