Rett før påske rapporterte vi om Ebba Forsbergs nye Cohen-plate, og no er det meir å sjå fram til for trufaste lyttarar der ute: Alltid energiske Christer Falck har samla ein haug med flotte artistar og forfattarar til å tolke Cohen i Oslo Spektrum i ein «uoffisiell» minnekonsert førstkomande tysdag, altså 25. april.

Håvard Rem skal vere konferansier, og elles byr programmet på ein frisk kombinasjon av veteranar og nykomlingar. Alle er dei godt eigna til å løfte fram sin indre Cohen, anten det no dreier seg om Aurora Aksnes, Anneli Drecker, Solveig Slettahjell, Jan Eggum, Knut Reiersrud eller Lars Lillo-Stenberg – berre for å nemne eit litt tilfeldig utval frå den imponerande lista med namn. Eg kryssar fingrane for eit lydopptak for dei som ikkje har sjansen til å kome.

Øyvind Vågnes