Nationaltheatret

Jonas Corell Petersen og ensemblet:

Arbeidstittel: Savnet fellesskap

Regi: Jonas Corell Petersen
Scenografi: Nina Damerell

Ibsenfestivalen handlar ikkje berre om Ibsen. I dette nyskrivne kollektive prosjektet, som sprikar i fleire retningar, er fellesskapen eit til dels samlande tema. Den leikne framsyninga stiller mange spørsmål, men gir få svar. Til gjengjeld er ho prega av overskot, absurd humor og stor speleglede, der dei fire aktørane manøvrerer seg gjennom tilværet tilsynelatande utan heilt å vite kvar dei skal.

Einsemd og depresjon, fellesskap og utanforskap, fridom og røyndom, fellesskap og privatliv, det sunne livet versus det søte livet, religion og politikk. Dette er berre eit knippe av tallause tema som framsyninga sneiar innom i løpet av nærmare tre timar. Noko kunne vore skore vekk, men det meste er underhaldande og dels tankevekkjande.

Dei fire skodespelarane – Ole Johan Skjelbred, Andrine Sæther, Tone Mostraum og Olav Waastad – går inn og ut av situasjonane med scenisk tryggleik og stor entusiasme. Men framsyninga verkar noko ustrukturert og innfallsprega. Kanskje slik framtida kan fortone seg, og slik det kjennest å baske med større og mindre eksistensielle spørsmål?

Jan H. Landro