MUSIKAL

HÅLOGALAND TEATER

The Sound of Music

MUSIKK: RICHARD RODGERS
SONGTEKSTAR: OSCAR
HAMMERSTEIN II
MANUS: HOWARD LINDSAY OG RUSSEL CROUSE
OMSETT OG BEARBEIDD TIL
NORDNORSK AV RAGNAR OLSEN
REGI: IVAR TINDBERG
SCENOGRAFI OG KOSTYME:
YNGVAR JULIN

Når Hålogaland Teater samarbeider med Nordnorsk Opera og Symfoniorkester og dessutan hentar heim sterke songkrefter frå andre delar av landet, blir det ei musikalsk framsyning på høgt nivå. At Ragnar Olsen har gitt både dialog og songtekstar nordnorsk klesdrakt, gjer så visst ikkje resultatet dårlegare.

I 27 år gamle Maria Nohr frå Kjerringøy har Hålogaland Teater funne ei musikalstjerne. Den klokkeklare mezzosopranen kling vakkert frå første tone og ber gjennom heile framsyninga. Nohr veit òg å bevege seg på ei scene, sjølv om ho kanskje ikkje kjenner seg like trygg i spelet som i songen. Men ho har eit sterkt scenisk nærvær og ei rik utstråling. Og kven andre enn sjølvaste Ingebjørg Kosmo (frå Fauske) har dei fått til å synge rolla som priorinna? Med lang røynsle frå operascena veit ho òg korleis ho skal te seg. Med seg har ho seks nonner, og saman leverer dei himmelske tonar. Elles utmerkar Svein Harry S. Hauge seg med ein morosam Max Detweiler, som rett nok held på å skli ut i parodien.

Det musikalske er overordna alt anna, men i Yngvar Julins praktfulle og særs funksjonelle scenografi blir også det stadig aktuelle temaet med trugande høgreekstremisme gitt den plassen det skal ha.

JAN H. LANDRO

Jan H. Landro er journalist, forfattar og fast skribent
i Dag og Tid.