SOGN OG FJORDANE TEATER

BODIL KVAMME:

Eg er i går

REGI: BODIL KVAMME
KOREOGRAFI: HILDE SOL ERDAL

Basert på intervju med tolv personar mellom 71 og 101 år har teatersjef Bodil Kvamme sydd saman ei framsyning der fire skodespelarar – Marit Østbye, Annlaug Børsheim, Claus Sellevold og Kyrre Eikås Ottersen – og seks dansande amatørar av den eldre garde presenterer glimt frå levd liv i Sogn og Fjordane. Her møter vi historiene til vanlege menneske som minnest likt og ulikt frå mellomkrigstida og fram til i dag. Mot bakveggen blir autentisk fotomateriale frå desse liva synte fram, og noko som kan minne om ein slagerparade av gamle poplåtar, gjer det klart kvar tidsmaskina har bringa oss.

For eit godt vakse publikum må det verke vemodig, for unge menneske heller fortone seg som uendeleg fjernt, ei tid i nøysemd og forsaking og med enkle, men ikkje desto mindre, gode gleder.

Bodil Kvamme har stykka opp stoffet slik at det aldri er tale om tolv forteljingar, men ein mosaikk som gir dynamikk og variasjon til framsyninga. At fylket hadde berre éin by (Florø) fram til 1990-åra, viser att i utvalet: Alt dreier seg om livet på landsbygda. Ikkje berre gardsarbeid og fiske, men også industri og andre næringar. Minst like sentralt er tilværet utanom arbeidsplassen, frå oppvekst og skulegang til ekteskap, barnefødslar, samliv og – i somme tilfelle – død og sakn.

Slik er det ei rørsle frå vogge til grav, der ulike tema, ulike livsfasar og ulike stemningar kjem til uttrykk. Også scenisk fungerer forteljeteateret bra.

JAN H. LANDRO

Jan H. Landro er journalist og forfattar og fast skribent i
Dag og Tid.