Kilden Teater

Jens Bjørneboe:

Jonas

Dramatisert av M.H. Hallum
Regi: Mari Vatne Kjelstadli
Scenografi og kostyme: Nathalie Mellby
Videodesign: Jonatan Sundström
Musikk og lyddesign: Honningbarna

65 år etter at Jens Bjørneboe gav ut sin sterkt systemkritiske skuleroman, er Jonas framleis aktuell, diverre. Det er ikkje utan grunn boka er trykt i over 300.000 eksemplar i Noreg og omsett til 40 språk. Måten Kilden Teater har behandla stoffet på, som ein kombinasjon av fortelje- og figurteater, bør kunne appellere til mange. For det er blitt ei framsyning med kraft og vitalitet.

Alt i boka er ikkje så lett å få til å fungere som teater – især når ein vil ha med seg så mykje som råd, både skuletematikken og idéstoffet. Men grepet med å la punkbandet Honningbarna stå for det musikalske og samstundes integrere dei fem medlemene fullt ut i det som skjer på scena, er framifrå. Godt fungerer det også å flytte små dokker rundt i miniatyrsamfunnet medan dei blir videofilma. På plussida kjem likeins eit velfungerande ensemblespel.

Meir problematisk blir det når vi etter pause kjem inn i eit totalt omrigga teaterrom, der mykje av handlinga går føre seg i ein «skog» som aktørane vandrar inn og ut av medan dei fører samtaler om klasse og kjønn, dødsstraff og anna – det vi kjenner som «jungmannens historie» i romanen. Her blir det vanskeleg for publikum å få med alt, og det verkar utanpåklistra.

I sum er likevel dette multimedieeksperimentet blitt ei framsyning eg trur kan tale til mange i dag.

Jan H. Landro

Jan H. Landro er journalist
og forfattar og fast skribent
i Dag og Tid.