Tigerstadsteatret og Oslo Nye Teater i Trikkestallen

Janne Teller:

Ingenting

Dramatisering: Toril Solvang
Regi: Hilde Brinchmann
Scenografi og kostyme: Ingrid Tønder

Kor mykje tenkjer vi eigentleg gjennom dei verdiane vi prøver å leve etter? Kva er det som gir livet meining?

Dette stykket for ungdom, som er like eigna for vaksne, tek oss gjennom ein tekst som lag for lag drøftar meininga med livet. Og det skjer i ei utfordrande form. På ein kvadratisk scene med publikum plassert på alle fire sidene, skal det utkjempast ein kamp om eksistensiell meining og verdiar mellom fleire skuleungdommar, spelte av ferske skodespelarar.

Pierre Anthon (Iver Innset) har komme til den konklusjonen at livet har inga meining. Derfor sluttar han på skulen og set seg i eit plommetre. Dette provoserer vennene hans så kraftig at dei set seg føre å demonstrere at det finst verdiar som gir meining. Men i kampen for å vise dette, provoserer dei kvarandre til stadig meir ytterleggåande handlingar. Det er som eit ekko av klassikaren Fluenes herre, men kanskje hakket meir skremmande. Og oppe i plommetreet sit han som er opphav til det heile, og stiller spørsmål ved det dei prøver å prove.

Framsyninga er dynamisk, dei medverkande (Hina Zaidi, Andreas Medbøe Thoresen, Maja Evenshaug Christensen, Arthur Hakalahti) utgjer eit godt og samspelt team. Men det er danske Janne Kellers tekst, opphavleg skriven som ein ungdomsroman, som gjer dette stykket så sterkt. Det tvingar oss til å tenkje gjennom våre eigne prioriteringar. Og når vi har gjort det, blir vi utfordra på dei igjen. Kva sit vi då att med?

Jan H. Landro