Hordaland Teater

Karen Blixen:

Babettes gjestebod

Omsetjing, dramatisering og skodespelar: Ragnhild Gudbrandsen
Regi: Stig Amdam
Musikk: Nils Økland

Karen Blixens snart 70 år gamle langnovelle er stadig like levande, og den røynde skodespelaren Ragnhild Gudbrandsen evnar å gi historia liv så du kjenner at dette stoffet framleis er aktuelt. Sist søndag hadde framsyninga premiere i Olsvik kyrkje i Bergen, og i vekene framover ventar ytterlegare 16 kyrkjer i Hordaland. Kanskje blir det turné i Sogn og Fjordane òg.

Gudbrandsen har sjølv lagt materialet til rette for scenisk framføring i ei naturleg blanding av forteljeteater og dramatisering, med henne sjølv åleine på scena den dryge timen framsyninga varer. Berre med varsam støtte frå Nils Økland på fiolin, fele og viola da gamba held skodespelaren den fullsette kyrkja fengsla frå byrjing til slutt.

Babettes gjestebod er ei forteljing om toleranse, medmenneskelegdom og kunst. Måltidet Babette, flyktning frå Pariskommunen i 1871, lagar til den vesle kyrkjelyden i for henne eksotiske Berlevåg 14 år seinare, er også kunst. Matkunst med evne til å løyse mellommenneskelege flokar og opne stengde sinn.

Det er ei trong, pietistisk verd svartkledde Ragnhild Gudbrandsen tek oss inn i. Men framsyninga er ikkje fri for humor. Med eit absolutt minimum av rekvisittar fortel og dramatiserer ho den merkelege historia. Verkemidla hennar er få og enkle, effektane minimale. Her er det ordet som skal tale, og det maktar Gudbrandsen på overtydande vis.

Jan H. Landro