11. januar i år gjekk Hiss Golden Messenger på scenen på The Cat’s Cradle i Carrboro, i heimstaten North Carolina, og framførte 15 songar, fleire av dei henta frå plater frå seinare år, som «Southern Grammar» (frå Lateness of Dancers, 2014, som for alvor fekk MC Taylors band ut til eit større publikum), tittellåten på Heart Like a Levee (2016), den medrivande avslutningslåten på Hallelujah Anyhow (2017), «When the Wall Comes Down», og «I Need a Teacher», singelen frå fjorårets Terms of Surrender – og no er heile kvelden samla på plate.

Då «I Need a Teacher» kom ut i fjor sommar, brukte MC Taylor musikkvideoen til å støtte lærarar i heimstaten i kampen for å få skikkelege arbeidsforhold i den offentlege skulen. Samtidig donerte han delar av inntektene frå konsertane til Durham Public Schools Foundation. Dette arbeidet held fram med konsertplata som no er ute, som har fått tittelen Forward, Children: A Fundraiser for Durham Public School Students.

Eg kan ikkje seie noko anna enn at eg ønskjer denne utgivinga særleg velkommen, sidan eg har irritert meg over å ha skusla vekk sjansen til å høyre Hiss Golden Messenger i ein liten klubb i Ballard i Seattle for nokre år sidan, fordi eg var for treig med å skaffe meg billettar den novemberdagen eg kom til byen – brått var konserten utseld. MC Taylor lagar rå, nær rockemusikk som er som skapt for den halvstore klubben – og, viser det seg, for stoveisolatet, så lenge både klubbar og skular er stengde.

Øyvind Vågnes