Pop

Ya Tseen:

Indian Yard

SubPop /
Playground

«I need your hands on me», heiter det i «Close the Distance», ein sensuell, mjuk poplåt som miksar R&B og element av soul og får nokre ekstra klangbotnar i pandemiens tid.

Sporet kjem midtvegs på albumet Indian Yard, som er første utgivinga frå Ya Tseen.

Politisk orientert

Bak namnet Ya Tseen står Nicholas Galanin, ein markant politisk orientert samtidskunstnar oppteken av verknadene av kolonialismens og kapitalismens herjingar, eit engasjement prega av eiga etnisk tilhøyrsle.

Galanin er fødd i Sitka i delstaten Alaska, der han også bur, og er av urfolksopphav (tlingit og unangax), og han har fått merksemd for måten den aktivistiske tilnærminga hans kjem fram på i ei heil rekkje uttrykk, mellom dei skulptur, video, installasjon og fotografi. Artistnamnet signaliserer livskraft og har bakgrunn i namnet hans på tlingit: Yeil Ya Tseen.

Indian Yard tilfører den rike og breie kunstnarlege aktiviteten fleire nye lag og står i slektskap med tidlegare prosjekt, men representerer også sjølvsagt noko heilt nytt. Sjølv om albumet er debuten for Ya Tseen, har Galanin gitt ut ein god del musikk tidlegare, under alias som Silver Jackson og Indian Agent, og han har samarbeidd med artistar som Meshell Ndegeocello, Tanya Tagaq og Samantha Crain.

Samarbeid

Også Indian Yard ber preg av nett samarbeid, for her dukkar Shabazz Palaces, Nick Hakim og Qacung opp, noko som har gitt plata eit skiftande og variert uttrykk.

Og på opningssporet «Knives» får han selskap av Portugal The Man, som er for rockestjerner å rekne i Alaska, i ein låt som har meir enn litt hitpotensial – ein kjærleikssong om lidenskap og risiko der ikkje minst vokalist John Baldwin Gourley finn seg godt til rette.

Eklektisk

Med element av silkemjuk pop og spiss hiphop er Indian Yard eklektisk, men likevel fokusert, i kraft av både eit tydeleg sosiopolitisk medvit og tematisering av det mellommenneskelege.

I eit intervju med The Guardian fortalde Galanin at han hadde sett ein dokumentarfilm om covidpasientar der det kom fram kor desperat dei lengta etter den nærleiken som kjem ved at vi faktisk trygt kan røre ved kvarandre, leggje hender på kvarandre. Vi er sosiale vesen, fastslo Galanin, og det er han ikkje den første som har sagt det siste året, men med ein song som «Close the Distance» får han sagt det på ein annan måte, ein måte som treffer rett i mellomgolvet.

Øyvind Vågnes

Øyvind Vågnes er forfattar og fast musikkskribent i Dag og Tid.