Trakassering

Mone Celin Skrede

mone@dagogtid.no

Boldrini er leiar for underhuset i det italienske parlamentet. I Italia er #MeToo meir som eit «Meh», skriv Jason Horowitz for avisa New York Times.

Dei einaste mennene med høg profil som er skulda for seksuell trakassering i Italia, er dei to filmregissørane Giuseppe Tornatore og Fausto Brizzi, skriv den italienske journalisten Simona Siri. I eit meiningsinnlegg i The Washington Post skuldar ho tidlegare statsminister Silvio Berlusconi for den haltande #MeToo-rørsla i landet.

– Å ha ein kvinnehatar som leiar i landet av og på i 20 år har fått etterverknader. I Italia har få kvinner stått fram, og svært få menn har vore nøydde til å svare for handlingane sine. Meir oppsiktsvekkjande er det at ingen politikarar har vorte råka, korkje høgt profilerte forfattarar, administrerande direktørar, dokterar, TV-personlegdomar eller journalistar, skriv Siri.

Førre fredag tok meir enn 600 kvinner plass i underhuset i det italienske parlamentet for å høyre på underhusleiar Laura Boldrini. Ho fortalde at kvinner i Italia opplever trakkassering, men samstundes veit dei at dei må stå imot eit svært fordomsfullt og patriarkalsk samfunn dersom dei står fram. Difor hever dei ikkje stemmene i #MeToo-kampanjen.

– Denne historiske rørsla betyr ikkje mykje for Italia, diverre, seier skodespelar Asia Argento til The New York Times.

Etter Weinstein-avsløringane i oktober i år har fleire høgt profilerte menn vore nøydde til å gå av. Det same har hendt i Europa, i Noreg seinast i TV 2 med avsløringane mot Davy Wathne og leiinga i kanalen. Og i Sverige denne veka gjorde regjeringa eit framlegg om ei samtykkelov.