Russland

Mone Celin Skrede

mone@dagogtid.no

Framgangsmåten i kampanjen viser korleis konspirasjonsteoriar får grobotn, skriv den britiske avisa The Guardian måndag.

Desinformasjonskampanjen hevdar Dei kvite hjelmane er ein terroristorganisasjon lenka til Al-Quaida. Han tek form som nyhendeartiklar og videoar som hamnar øvst i søkjealgoritmane til fleire av dei største søkjemotorane på nettet. Fil Menczer, ein datavitskapsprofessor ved Indiana-universitetet, er ein av forskarane som skal ha funne prov på kampanjen. Han har utvikla Hoaxy, eit verkty som kartlegg spreiinga av desinformasjon på nettet.

Dokumentasjon

Svertekampanjen skal ha teke til på same tid som Russland sette i gang eit militært inngrep i Syria i september 2015. Russland støtta hæren til president Bashar al-Assad med luftåtak på område som opposisjonen rådde over. Og nesten med éin gong sette russiske riksmedia, som Sputnik, i gang med å hevde at IS var det einaste målet, og med å så tvil kring bombinga av infrastruktur og sivile område. Dei kvite hjelmane vert utpeikte fordi dei speler to avgjerande roller i Syria, ifølgje avisa: Den eine er redningsarbeidet dei driv, og den andre er dokumentasjonen av det som skjer i Syria, gjennom kamera, både handhaldne og på hjelmar.

– Dette har irritert ikkje berre Assad-regimet og Russiske styresmakter, men mange av propagandistane som jobbar rundt dei, seier krisehandteringssjef Kristyan Benedict i Amnesty International til The Guardian.

Russisk propaganda

«Måten den russiske propagandamaskina har retta seg inn mot Dei kvite hjelmane på, er ein ryddig saksstudie i dei rådande informasjonskrigane. Han avslører nett korleis rykte, konspirasjonsteoriar og halvsanningar boblar opp i toppen av søkjealgoritmane til Youtube, Google og Twitter», skriv den britiske avisa.

– Dette er hjartet av russisk propaganda. Tidlegare forsøkte dei å framstille Sovjetunionen som eit samfunnsførebilete. No handlar det om å forvirre menneske med så mange ulike alternative forteljingar at folk ikkje kjenner att sanninga, seier David Patrikarakos, forfattar av boka War in 140 Characters: How Social Media is Reshaping Conflict in the 21st Century.

Dei kvite hjelmane har fått mediemerksemd dei siste åra. Ikkje minst grunna dokumentarfilmen De hvite hjelmene, som vann Oscar. Organisasjonen er offisielt kjend som Det syriske sivilforsvaret, ein humanitær organisasjon med 3400 frivillige som har redda tusenvis av syriske sivile ut av bombeåtak. Arbeidet deira har gjeve dei to nobelprisnominasjonar.