Kva institusjon?

5 POENG: Eit av dei viktigaste historiske døma på ein slik institusjon er Bayt al-Hikmah, som låg i Bagdad og vart øydelagt i 1258. I Noreg har me mange slike, inkludert eit tilrettelagt. Sistnemnde skifta namn i 2024 til Tibi.

4 POENG: Svaret inngår i tittelen som Aslak Sira Myhre har hatt sidan 2014. Då er me på nasjonalt nivå.

3 POENG: Institusjonen finst òg på fylkesnivå. Dessutan skal alle kommunar ha dette. Det same gjeld grunnskular, men kvaliteten varierer. Bayt al-Hikmah tyder Visdommens hus.

2 POENG: Det mest kjende dømet i antikken låg i Alexandria.

1 POENG: Ordet kjem frå gresk for «forråd av bøker».

Kva film?

5 POENG: Lorentz N. Kvam (1891–1947) er best kjend som forfattaren av boka bak denne filmen. Han gav ut boka i 1919 under pseudonymet Rocambole Pedersen. Kvam levde enno då filmen hadde premiere.

4 POENG: Andre verdskrigen var ei blømingstid for norsk underhaldning på kino. Til dømes denne komedien frå 1941. Joachim Holst-Jensen spelte tittelfiguren, som heiter H. Brand. Dette er ikkje hovudrolla.

3 POENG: Hovudrollene var ved Leif Juster og Ernst Diesen.

2 POENG: Etterforskarane Stein Rask og Simon Gløgg er på leiting.

1 POENG: Handlinga i eit nøtteskal: Ein som lagar ulike kjøtprodukt, har blitt borte. Han vert funnen etter mykje hurlumhei.

Kva sport?

5 POENG: I 2001 skulle verdsforbundet for denne sporten kåre hundreårets beste utøvar. På kvinnesida vann cubanske Regla Torres. På herresida vart sigeren delt mellom amerikanske Karch Kiraly og italienske Lorenzo Bernardi.

4 POENG: Sporten kom på OL-programmet i 1964. Det øvste nivået i Noreg, både for kvinner og for menn, heiter Mizunoligaen.

3 POENG: Kvart lag har seks spelarar på banen om gongen. Verdsforbundet vert forkorta til FIVB.

2 POENG: Det første leddet i namnet tyder «slag eller spark på ballen før han når bakken».

1 POENG: Ein liknande ballsport har førsteleddet sand-.

Kva person?

5 POENG: Denne personen (1820–1910) er nær knytt til ein merkedag 12. mai. I arbeidet sitt vart personen òg ein statistikkpioner, til dømes med coxcomb-diagrammet (ein type kakediagram).

4 POENG: Briten var omsorgsfull, kunnskapsrik og handlekraftig, også når det gjaldt å skaffe pengestøtte. Den best kjende innsatsen var i Istanbul i 1850-åra.

3 POENG: Coxcomb-diagrammet viste at soldatane i Krimkrigen døydde oftare av sjukdom enn av krig. Hygiene og psykososiale tiltak fekk dimed større merksemd.

2 POENG: Ho vert rekna som grunnleggjaren av moderne sjukepleie.

1 POENG: Ho gjekk nattlege inspeksjonsrundar. Soldatane var fulle av respekt for The Lady with the Lamp.

Svar på hinta

Kva institusjon: Bibliotek (Tibi er det nye namnet på Norsk lyd- og blindeskriftbibliotek. Aslak Sira Myhre er nasjonalbibliotekar.)

Kva film: Den forsvundne pølsemaker

Kva sport: Volleyball

Kva person: Florence Nightingale (Fødselsdagen 12. mai er den internasjonale sjukepleiardagen.)