1. Kjetil i Slik skal vi velge våre ofre av Bjørn Vatne: Kjetil Grofsa er reklamemann og aleinefar om dagen. Om natta er han Coupat, bloggar med sterke meiningar. Han kjem inn i ein sirkel der han stadig må trø hardare til for å få den ønskte dosen ros frå bloggarar som han ser opp til. Snart står jobb, rykte og foreldrerett på spel, og det blir avgjerande at skotta mellom Coupat og Grofsa er vasstette. Men veggene på nettet er porøse.

2. Agnes i Alt inkludert av Marit Eikemo: Agnes, ei kvinne utan fortid og utan møblar, går inn på nettstaden Finn.no for å skaffe det ho treng av inventar. Ho oppdagar at det som er gratis på nettet, likevel kjem med ein pris. I den moderne byteøkonomien er reglane diffuse, men dei som gjev bort ting, ventar seg noko att i naturalia: omsorg, ein god lyttar, sex og så vidare. Agnes sit i klisteret.

3. Elin i Torget av Victoria Durnak: Elin ligg eitt hakk høgare enn Agnes i næringskjeda. Ho er hekta på Finn.no. Men når ho ikkje lenger sjølv har plass til tinga ho får tak i der, tilbyr ho seg å transportere saker frå givar til mottakar. Her kjem den digitale gråsoneøkonomien til syne på ein litt annan måte: Fortener ho takk for tenester ingen strengt tatt har bede om, og går det an å vente immaterielle gjenytingar?

Marta Norheim