1. Rattpølsa: I huda til sjøpølsene finst mikroskopiske kalklekamar, fantastisk utforma som små ornament. Kalklekamane sit rett under hudoverflata og fortel straks kva dyr det er. Alle veit korleis styrerattet på gamle seglskip såg ut, men kven var først ute med oppfinninga? Det var den 10 millimeter store sjøpølsa Acanthotrochus mirabilis. Hjula har eiker, akkurat som sykkelhjul, i tillegg til spilene som går ut frå «felgen».

2. Rubinpølsa: Den neste sjøpølsevennen min har det velklingande namnet Mesothuria borealis, og han ser verkeleg ut som ei pølse, med kroppslengd opptil 20 centimeter. Også ho har mikroskopiske løyndomar. Kalklekamane har to eller tre løkker med utvekstar til sida. I tillegg har naturen skapt små ankerornament samanknytte med noko som liknar på tennisracketar. Som prikk over i-en inneheld huda massevis av små, illraude rubinar – fosfatlekamar.

3. Ankerpølsa: Til sist ei lita sjøpølse som heiter Labidoplax buskii. Til armering av kroppsveggen har ho valt små gjennomhola plater med handtak. I handtaket er det festa eit anker, og ankerkrokane stikk ut gjennom huda. Ganske fantasifullt, spør du meg. Sjøpølsa er ikkje stor, kanskje 30 millimeter. Rundt svelget er ho også forsterka, med ti kvitglansa
kalkplater som heng saman i ein ring. Stilig!

Arne Hassel