KULTUR

OTTAR FYLLINGSNES

ottar@dagogtid.no

I 2016 kunne Dag og Tid for første gong registrera over 11.000 abonnentar. Opplaget auka med 262, til 11.211. Medan mange norske aviser har hatt nedgang, har Dag og Tid registrert ein auke kvart år dei siste fjorten åra.

– Det er både gledeleg og viktig at veksten held fram. Det skaper ein eigen driv i bladstova, både for marknadsførarane, journalistane, desken og dei eksterne skribentane.

Trass i veksten meiner me at avisa er så god at ho kan nå ut til langt fleire. Det kortsiktige målet er eit opplag på 15.000. Me får mange gode tilbakemeldingar og trur at folk ønskjer seg ei god papiravis ein gong i veka, seier redaktør Svein Gjerdåker. Han peikar på at ei vekeavis ikkje kan følgja den den daglege nyhendestraumen.

– Difor krevst det gode journalistar og kommentatorar, og me opplever no at mange skribentar vender seg til Dag og Tid – òg bokmålskribentar. Mange av dei faste skribentane våre nyttar bokmål til dagleg. Det er krevjande i starten for bokmålingar å skriva nynorsk, men mange seier dei likar det.

Denne veka tek Dag og Tid i bruk eit nytt produksjonssystem.

– Det gjer det lettare for oss å distribuera avisa på alle plattformer – både på papir og elektronisk. Det er eit stort framsteg og gjer det mogleg for å auka opplaget ytterlegare. Med gode folk og gode tekstar skal vi klare det.

Han er oppteken av at Dag og Tid skal vera open for ulike synspunkt.

– Sjølv synest eg det er keisamt å lesa det same som eg meiner sjølv. Eg vil bli utfordra. redaktøren.