Sundag 10. september, Brakanes hotell

Postludium

Eg reiser frå unelege Ulvik,

denne «perla midt i jøkulverda»,

i lufta dansar det glade svaler,

dei fylgjer meg på ferda.

Farvel, poesifestival, tiande i rekkja.

Her er enno mangt eg ikkje nemnde:

Ruth Lillegravens lyrikk for barn,

«Skogen den grøne»,

som ho lanserte på Brakanes hotell;

den nye filmen om den vestlandske skalden:

«Solreven» om Kjartan Hatløy;

og folkemusikkgruppa Tidekverv,

som spela sundag i Ulvik kyrkje.

Vi skal òg nemne at professor Ole Karlsen

var vinnaren i år av Amboltprisen,

som Venelaget Olav H. Hauge deler ut.

Kjære lesar, du poesiens pilegrim,

eg skriv ikkje meir på denne spalta,

for eg gjekk tom for gode – og dårlege – rim.