Freding av industrielle kulturminne

Stortinget har vedteke ei liste på femten tekniske og industrielle anlegg som Riksantikvaren ynskjer å frede. Fem av desse anlegga er alt freda. No går Riksantikvaren i gang med fredingssaker for dei resterande ti anlegga, står det å lesa på nettsidene til etaten.

Dei ti anlegga er svært ulike både i omfang og type, heiter det vidare, men dei skriv seg alle frå framvoksteren av det moderne Noreg, i ei tid då det handla om å temja naturen, få i gang ein storstilt vareproduksjon og effektivisere arbeidet. Mellom dei ti anlegga finn vi Neptun Sildoljefabrikk i Hadsel, Klevfos Cellulose og Papirfabrik i Løten, Salhus Tricotagefabrik i Bergen og Spillum Dampsag og Høvleri i Namsos.

Dobbeltgjengar-app

Google har lansert ein ny app for dei kunstinteresserte: Arts and Culture. Ein underdel av denne appen har ein hugtakande funksjon for dei som aldri rakk å sitja modell for ein kjend kunstnar, anten det no var Edvard Munch eller Odd Nerdrum. Med appen kan du nemleg laga sjølvi og finne din dobbeltgjengar. Google har titusenvis av kunstverk til rådvelde for denne appen. Det er kunstverk Google har gjort tilgjengelege i samarbeid med 650 partnarar i kunstverda. Appen er enno ikkje introdusert i europeiske land, men Google melder at det alt er lasta ned 78 millionar kunstsjølviar i USA. Appen har òg andre fine funksjonar, som virtuell guiding i kunstmuseum.

ronny@dagogtid.no