I 70- og 80-åra steig nyromantikken fram i europeisk poesi. Han kom som ein reaksjon på både ein mørk, eksistensiell poesi i 50-åra og ei nyenkel dikting i tiåret etter, og han oppnådde stor popularitet mellom diktlesarar. Eg har budd i Belgia og studert diktarar som tok del i dette straumdraget, som flamlendaren Luuk Gruwez.

Norsk poesi fekk ei anna utvikling. 80-åra var merkt av Tor Ulvens stil: ein mørk, minimalistisk tone. Difor fekk nyromantikken ikkje same gjennomslagskrafta her. Det er synd, for det finst norske lyrikarar som har mykje til felles med kontinentale nyromantikarar. Ein av dei er Per Olav Kaldestad.

«Nixon-sonetten» er frå Det er framleis sol (1975), ei samling som struttar av litterært overskot og skaparlyst. Og her stig Per Olav Kaldestad fram som meisteren av sonettforma, slik mange lesarar kjenner han. Sonetten er ei diktform inndelt i to strofer på fire versliner og to på tre versliner – dei siste seks linene kallast ein «tersett». Nyromantikarane dyrka – og leika med – sonettforma. Det same gjer Kaldestad i dette diktet: Medan han skriv, diskuterer han om det finst rimord på Nixon på norsk og kor langt han er komen i skrivinga – «berre ein snau sestett står igjen!»

Det finst dei som trur at litterære eksperiment berre er mogeleg innan frie vers. Kaldestad gjer slike oppfatningar til skamme. Same samlinga og neste bok, Skuggelandet (1977), inneheld også andre sonettar med snerten omgang med den klassiske tradisjonen, som «Min song om kvelden», som inneheld allusjonar til både Wergeland og T.S. Eliot. Kaldestad har mykje sams med den store fornyaren av klassisk versekunst i førre hundreåret: W.H. Auden, ein diktar han sjølv har gjendikta til norsk. Men leikelysta står ikkje i vegen for alvorlege bodskapar. Byt ut «Nixon» med «Trump», og diktet har relevans for den politiske situasjonen i dag òg.

Kaldestad er ikkje teken med i diktantologien som har hatt status som norsk kanon, Ivar Havneviks Den store norske diktboken. Det fortel mykje om klimaet som har rådd i norsk poesi. 26. juni fyller Per Olav Kaldestad 70 år. Vi gratulerer han med dagen!

RONNY SPAANS