No må TV 2 også skrive nynorsk

«Vi er glade for at den nye TV 2-avtalen seier tydeleg at TV 2 må nytte begge dei to offisielle målformene», seier Magne Aasbrenn, leiar i Noregs Mållag i ei pressemelding frå Noregs Mållag, om den nye konsesjonsavtalen mellom staten og TV 2.

Torsdag signerte TV 2 og Kulturdepartementet ei konsesjonsavtale om at TV 2 får halde fram som allmennkringkastar også dei neste fem åra. Per år skal TV 2 motta 135 millionar kroner i stønad, men då må kanalen også oppfylle visse krav. Eit av desse er at hovudredaksjonen må ligge minst 100 kilometer frå Oslo, eit anna er at begge målformene skal nyttast. I søknaden har TV 2 vist til at dei har mange nynorsktalande medarbeidarar, og skal dei fylgje avtalen, må dei heretter også sleppe nynorsken til i eigen tekstproduksjon. Dette gjeld skjermvignettar, teksting av film og nettsida TV2.no.

«Det er bra at prinsippet om hovudkontor langt unna Oslo-gryta ligg fast. Det gir betre journalistikk at nyhende blir formidla med ulike perspektiv som ein får ved å vere og ha sitt virke i ulike delar av landet. Det er dessutan viktig for rekruttering av nynorskjournalistar på Vestlandet at dei kan ta seg arbeid også i TV 2, men bu og arbeide på Vestlandet», heiter det vidare i pressemeldinga.

Kven blir ny riksantikvar?

Fristen for å søkje på stillinga som riksantikvar er ute. Lista over søkjarar er offentleg, og Dag og Tid har kika på henne. Det er ti søkjarar, og som vanleg ved slike stillingar er to eller tre ikkje er kvalifiserte. Elles finn vi namn som Audun Eckhoff, tidlegare direktør for Nasjonalmuseet. Åremålet hans gjekk ut i fjor, og då fekk han etterløn på tre millionar utan arbeidsplikt. Det vekte kritiske innlegg i avisene. Terje Gansum som er seksjonssjef for Kulturarv ved Vestfold fylkeskommune, søkjer òg. Så finn vi Nina Berre, tidlegare direktør i Norsk Form, Nina E. Eidem, direktør i Forsvarsbygg Nasjonale festningverk, Per Morten Ekerhovd, direktør for kultur og idrett ved Hordaland fylkeskommune. Og sist er det to interne søkjarar: Leidulf Mydland og Hanna Geiran, begge avdelingsleiarar hjå Riksantikvaren. Mange ynskjer seg ein kvinneleg riksantikvar. Då er det eit par namn å taka av.

ronny@dagogtid.no