Lesarar av denne spalta etterlyser meir nærlesing av dikt. Ein lesar har òg spurt etter ein analyse av det mest kjende diktet til Bertrand Besigye, diktaren eg presenterte sist: «Og du dør så langsomt at du tror du lever» frå 1993.

Eg har to stikkord til ein analyse av diktet. Det fyrste er «memento mori». Mottoet er alt tydeleg i dei fyrste to verslinene. «Når livet blir skapt, blir dauden fødd», heiter eit ordtøke. Livet du lever, er såleis «ein langsam daude». Ramnen i diktet er i mange kulturar ein døds- og åtselfugl. Når han flyg med krumme klør, er det beina dine han er klar til å hente – menneskeknoklar er om lag like tjukke som den greina ramnen har hatt mellom klørne.

Det andre stikkordet er imagisme, ei retning innan anglo-amerikansk poesi tidleg på 1900-talet. Imagismen krev direkte handsaming av «ting» og ei avskrelling av overflødige ord. Eit godt døme er «Beachcomber», «Loffar på stranda», av Orknøy-diktaren George Mackay Brown: «Friday I held a seaman’s skull, / Sand spilling from it», «Fredag heldt eg ein sjømanns hovudskalle/ sand rann ned frå han» (gjendikting ved Åse Lilleskaret Faugstad). Symbolikken til timeglas og daudingskalle blir meisterleg uttrykt heilt konkret.

Slik er det med sykkelen i diktet. Sykkelpedalane er ei konkretisering av tidshjulet – eit anna symbol for det forgjengelege. Du sjølv driv tidshjulet framover med føtene. Ja, alle rørsle du utfører, er ei konkretisering av tidshjulet, for «du beveger deg i sirkel».

Det er òg tale om eit taktskifte i diktet. Fyrst ruslar du morgontur, så rører du deg snøggare framover på sykkel. Det siste kan vise til eit auka dødsmedvit i høg alder. Du vil leva livet meir intenst, men då nærmar du deg berre ramnen i avstand. Det blir konkret uttrykt i overgangen frå sko mot bakken til pedalar i lufta. «Varmen» i versline tre har sitt motstykke i «kulden» sist i diktet.

Og kva med det kvasse nebbet til ramnen? Det spelar på mannen med ljåen. Like visst som at du lever, like visst er det at han kvesser ljåen i vente på din daude.

Ronny Spaans