POESI

RONNY SPAANS

ronny@dagogtid.no

Programmet for Ulvik poesifestival vart sleppt denne veka. Festivalen har fått status som ein av dei viktigaste lyrikkfestivalane i Norden, og går av stabelen annakvart år i andre helga av september på heimstaden til Olav H. Hauge. I år skjer det 7.–9. september.

Også i år er det overraskingar på lur. Det er ikkje ofte den folkekjære diktaren Kolbein Falkeid gjestar norske poesifestivalar. Men han kjem i september og les opp. Det gjer òg Ole Paus, Kjartan Fløgstad og Herborg Kråkevik.Ruth Lillegraven lanserer ny bok under festivalen: Skogen den grøne. Så kjem den kritikarroste kvartetten 9 grader nord med nye musikalske opplevingar frå nære og fjernare himmelstrøk.

Temaet for festivalen i år er «ordskifte». «Med dette temaet ynskjer vi å lyfte fram poetar som vågar å engasjere og utfordre», seier dagleg leiar Geir Netland i pressemeldinga frå Ulvik.

Fleire av forfattarane som kjem til festivalen, tek på ulikt vis opp samtidsaktuelle tema i diktinga si, som Cecilie Løveid, Øyvind Berg, Knut Ødegård, Tone Hødnebø, danske Asta Olivia Nordenhof og finlandssvenske Catharina Gripenberg.