Rettsmål

RONNY SPAANS

ronny@dagogtid.no

Den som var stades i Noregs Høgsterett denne veka, var vitne til denne domsavseiinga: «Dommer Bull: ’Jeg er i det vesentlige og i resultatet enig med førstvoterende.’ Dommar Høgetveit Berg: ’Det same.’ Dommer Ringnes: ’Likeså.’ Dommar Utgård: ’Det same.’»

«Likeså» er den bokmålske termen for «eg er samd», medan «det same» er den nynorske. Dette vitnar om ein unik situasjon i Noregs Høgsterett: To av tjue høgsterettsdomarar er nynorskbrukarar. (Då er justitiarius medrekna.)

Dette skjedde med at Borgar Høgetveit Berg vart utnemnd til ny dommar i Høgsterett. Høgetveit Berg har vore advokat hjå mellom anna Regjeringsadvokaten, og nynorsk har fylgt han gjennom karrieren. Karl Arne Utgård, som tidlegare har vunne prisen «Årets nynorskbrukar», vart utnemnd i 1999. Er ein fyrst utnemnd, kan ein ha posisjonen som høgsterettsdomar til ein fyller sytti år. Difor er dagens situasjon spesiell.

Nynorsk har vorte bruka i Høgsterett tidlegare, men då av nynorske jusprofessorar som har vore henta inn som konstituerte domarar, som Knut Robberstad i 1950-åra. Karl Arne Utgård er den fyrste nynorskbrukande juristen som vart tilsett som høgsterettsdomar.

Og kva galdt domen? To menn vart mellom anna dømde for å ha utnytta indiske sesongarbeidarar til tvangsarbeid i to gartneri på Austlandet.