Rådyrt kulturhus i Dundee

Debatten om rådyre kulturhus og signalbygg kjennemerkjer ikkje berre Noreg. I Dundee i Skottland er eit nytt Victoria and Albert Museum reist: V&A Dundee blir opna no laurdag med friluftskonsert, der det skotske rockebandet Primal Scream spelar. Bygningen ser sjølv ut som eit «primal scream», ein svart koloss ved hamnesida.

Byregjeringa vonar kunstmuseet vil ha same effekt som Guggenheim-museet i Bilbao i Spania, altså skapa økonomisk vokster i byen. Om Guggenheim-museet berre har vore til bate, er vel heller usikkert. I Bilbao har den alternative kunstscena og det kommersielle kulturlivet i byen slite. Og ingen andre kriseråka byar har greidd å herme Bilbaos økonomiske vinning av kultursatsinga.

Og som ofte med slike prosjekt har prislappen svulma under bygginga. Den endelege kostnaden på bygget er nesten dobbelt så høg som det opphavlege budsjettet på 45 millionar pund. Rekninga enda på 80 millionar pund – om lag 900 millionar kroner. Men det er ikkje berre byggjekostnadene som skaper bry. For å dekkje driftskostnadene er museet avhengig av ein offentleg stønad på meir enn 1,7 million dollar i året.

Ny historisk vandrerute

Ruta Den Norske Turistforening (DNT) har frå Saraelv til Reisavann får offisiell status som «Historisk vandrerute». Det melder Riksantikvaren. «Dette er en turopplevelse basert på Reisadalens mangfoldige historie, og langs turen kan du blant annet lære om tjærebrenning, lakselorder, reindrift og forhistorisk jakt på villrein», seier generalsekretær i DNT, Nils Øveraas.

Den nye ruta blir feira laurdag 15. september med tur, underhaldning og festmat. Feiringa skjer på besøkssenteret til Ovi Raishiin. Ruta er rydda og nymerkt, og undervegs er det sett opp informasjonspunkt der turgåarar kan lesa om Reisadalens spennande historie. Han skal opne ruta offisielt saman med fungerande riksantikvar Marit Huuse og fylkesråd Willy Ørnebakk.

Ruta som no blir opna, er den tiande ruta som er etablert etter at Riksantikvaren og DNT i Friluftslivets År 2015 sette i gang ei sams satsing for å auke bruken av gamle ferdselsårer som turruter.

ronny@dagotid.no