Eg var tolv då eg skjønte

eg var unormalt opptatt

av Mel C

Eg var seksten då eg tenkte det høgt

for første gong

Eg er ikkje så interessert i gutar, eg

eigentleg

fordi

fordi

om du skjønnar?

Eg var nitten då eg hoppa ut av klesskåpet

på folkehøgskulen

Det skulle vere komisk

noko ufarleg

men det dundrande hjartet

ville det annleis

Eg var tjueein då T-skjorta matcha

den andre miljøarbeidaren si

Eg liker jenter

Eg òg

Eg var tjuetre då eg såg på bestemor

la ned gaffelen, tok sats

kremta

gret

Eg var tjuefem då eg vart forelska

i ein indisk muslim

på ein skjønnheitssalong

og sa det til sjefen hennar

Eg var tjueni då eg laga quiz

om det

for nye kollegaer

Eg var tretti då eg leia ein kjærast

over Torgallmenningen

Byrja å seie ho heiter

ho og eg

ho, ho, ho

Eg var trettifem då eg fortalde vaskedama på jobb

eg har treft ungdomsforelskinga mi

på Tinder

Eg kjem til å bli bonusmamma

er det ikkje fantastisk?

Eg var trettiseks då eg skreiv

Eg er trygg

på facebookstatusen min

under Oslo Pride

Det er uendeleg mange måtar

å fortelje denne verda på

Er eg heldig

privilegert

bortskjemd

som berre har fått kjærleik

tilbake?

Og er eg naiv

når eg tenker

kanskje ville det ikkje skjedd

om også han

hadde fått

den same kjærleiken

gjennom livet?

Nina Bergheim Dahl