Vinjesenteret får utvide

Vinjesenteret, Vinje-filialen av Nynorsk kultursentrum, får 8,4 millionar på statsbudsjettet til ombygging og påbygging av gamle Vinje skule i Vinje i Telemark. Tilbygget har eit samla budsjett på 29 millionar. Løyvinga til Nynorsk kultursentrum aukar elles med 2,2 prosent til 20,5 millionar.

Digitaliserer ordbøker

Det Norske Akademis ordbok kjem i år inn på statsbudsjettet med eit tilskot på 2 millionar kroner. Ein like stor sum går til Universitetet i Bergen og arbeidet med å digitalisere Norsk Ordbok (NO), melder regjeringa. Det er foreslått til saman 10 millionar kroner til ordboksarbeid i 2019, og prosjektet med å revidere Bokmålsordboka og Nynorskordboka blir ført vidare med seks millionar kroner. Regjeringa arbeider med ei språklov med ein meldingsdel om språkpolitiske tema.

Styrkjer Språkbanken

Regjeringa gjer framlegg om å styrkje den nasjonale satsinga på digitale språkressursar på norsk. Språkbanken er ei teneste i Nasjonalbiblioteket som blei etablert i 2010, med digitale tekst- og taledata som dannar grunnlag for å utvikle språkteknologi på norsk.

Samlaget får pengar til lydfiler

Det Norske Samlaget er tildelt 1 million kroner på statsbudsjettet for å legge til rette for fleire utgivingar av lydfiler og serieromanar på nynorsk til born og unge. Elles aukar løyvinga til Samlaget med 9 prosent, til 17,7 millionar.