Det vibrerande slankebeltet var vanleg å sjå på treningsstudio tidleg i 1930-åra. Målet var å trene utan å bli sveitt. Ein trong berre plassere beltet der ein ville forbrenne feittet, skru på vibrasjonen og lene seg tilbake. Det var også mogleg å snu seg rundt slik at det var magen som fekk ristinga. På denne måten skulle feittet røskast laust og forsvinne ut av kroppen. I ein annonse for slankebeltet vart det hevda at straumen av feitt faktisk kunne auke med heile 3200 gonger i minuttet.

Maskina er endå å få tak i, men lovnadene om effekt er førebels ingen stad vitskapleg dokumentert.

Dagens treningsstudio har ikkje vibrerande slankebelte, men satsar på trening med sveitte. Det er likevel stadig utvikling av apparat og øvingar som skal auke effektiviteten. Nåtidas tendens er mindre fokus på stasjonerte apparat der rørslene er låste i bane, og meir bruk av frie vekter som krev at kroppen heile tida må jobbe med eigen balanse. Instruktørane tek no gjerne med seg grupper ut. På biletet ser vi ei kvinne som skubbar tunge vekter. Slik trener ho føter, armar og kjernemuskulatur på ein gong. Denne øvinga gjer at du må dusje, og er nok 3200 gonger meir effektiv enn rumpemaskina.

Maren Bø

Maren Bø er idrettspedagog og frilansskribent.