Biografi

Heidi
Linde og Lina
Raknes (ill.):

Ole
Gunnar Solskjær

Gyldendal

I bakrusen etter bokmessa i Frankfurt har vi fått ei hovudpine: Færre les bøker. Vi mistar lesarane. Dette er ikkje noko særnorsk fenomen, men der vi i Noreg rettar lesesatsingane mot skulane og institusjonane, er oppskrifta annleis i Tyskland: På helsestasjonen får alle foreldre bokpakkar på eittårskontrollen. Oppmodinga er klar til mor og far: Les til barnet ditt i eit kvarter, kvar dag. No går barneboksalet i Tyskland oppover.

Biografien om Ole Gunnar Solskjær svarar godt til ei slik oppmoding.

Boka toler både ein uerfaren høgtlesar og ein uerfaren lyttar. Historia har ei tydeleg, kronologisk oppbygging og ein tiltalande, lettfatteleg moral. Kjende detaljar frå legendariske kampar står side om side med ukjende fakta og forteljingar frå treningskvardagen. Guten hadde ikkje alle føresetnader for framgang, han måtte trene hardt og smart.

Dette er den fjerde biografien for små lesarar i nysatsinga frå Gyldendal. Etter Sonja Henie, Kim Friele og Gro Harlem Brundtland var det kort sagt på tide med ein mann. Omslag og design har eit i overkant feminint preg – om vona er å lokke fleire lesarar av same kjønn som hovudpersonen. Illustrasjonane elles er spreke og gode. Lina Raknes skyt så å seie med både venstre og høgre fot, samtidig som ho spelar på eit breitt spekter av verkemiddel i formidlinga.

Janne Karin Støylen