DEN KRISTNE DYLAN

Ein ny dokumentarfilm syner gløymde opptak frå Bob Dylans kristne periode. Frå 1979 til 1981 gav han ut ein kristen trilogi, og denne perioden vert skildra i filmen som får premiere 2. oktober på New York Film Festival, skriv Politiken.

I 1979 byrja Dylan å opptre i mindre salar i staden for på store stadion. Lyden var annleis, og klassikarane hans var borte. No handla det om kristenrock og gospel. Afroamerikanarar song i kor, og på plata Slow Train Coming syng Dylan: «Well it may be the devil or it may be the Lord/ But you’re gonna have to serve somebody».

Reint musikalsk kraup Dylan til krossen då han gav ut Slow Train Coming, Saved og Shot of Love. Åra vart kalla The Born Again-perioden og vert skildra i dokumentaren Trouble No More. I filmen er det opptak frå tre konsertar i USA og Canada.

STIPEND TIL HÅHEIM

Bjørnsonstipendet i år går til Marianne Clementine Håheim, som debuterte med diktsamlinga Bilydar i 2012. Fire år seinare kom Svart belte som har både fridom og undergang i seg.

– Det er gjennom detaljar i språket og i eit vakkert, poetisk overblikk Håheim løftar sjukdomshistoria opp til å verta noko som er både godt og vondt å lesa, meiner Eirik Ingebrigtsen, leiar i Det litterære råd i forfattarforeininga.

Bjørnsonstipendet vert delt ut 6. september.

MÜHLEISEN PÅ TYSK

Wenke Mühleisens roman Kanskje det ennå finnes en åpen plass i verden har vekt interesse i Tyskland og Austerrike. Fleire forlag har vore interesserte i å gje ut boka, og bodrundane har vore intense, melder Gyldendal.

Forlaget Zsolnay vann kampen. Boka skal koma på tysk i januar 2019 og skal vera hovudsatsinga for forlaget denne våren. Forlaget har distribusjon i alle tyskspråklege område.

ottar@dagogtid.no