Andrea Büttner:
«Shepherds and Kings»

Bergen Kunsthall, Bergen

24. august–28. oktober 2018

Den tyske kunstnaren Andrea Büttner viser ei svært mangfelt utstilling i Bergen. Her er steinar med levande moseartar, glasmåleri, store installasjonar og lysbilete, for å nemne noko. Ho sankar kunstverk gjennom heile kunsthistoria, og dei vert fletta saman til ein vev av sosiale og etiske tema som fattigdom, arbeid, samfunn og tru.

Mette Tronvoll: «Portretter»

Dropsfabrikken, Trondheim

8. september–21. oktober

Fotokunstnaren Mette Tronvoll er kjend for portretta sine. Det er fascinernade korleis menneska på bileta hennar granskar fotografen like mykje som ho granskar dei. Dette intense medvitet om situasjonen skaper større likevekt i maktspelet mellom den som tek bilete og den som vert avbilda. Dropsfabrikken viser verk frå dei to seriane «Afrikanske bilder» (2016) og «Zambia» (2014). Verka har mykje av dokumentarfotografiet over seg. Ho tek bilete av menneske i deira naturlege miljø. Ho nyttar analogt kamera og manipulerer ikkje bileta. Såleis er teknikken med på å forsterke det autentiske ved verka.

Erlend Leirdal: Skiftninger

Nils Aas Kunstverksted

22. september–18. november

Skulpturane til Erlend Leirdal har eit røft uttrykk som er lett å kjenne att. Formene er enkle og grovt hogde. Samstundes har dei smekre former, og går ein nærare, endrar dei gjerne karakter og verkar overraskande mjuke og organiske. Hovudverka i ustillinga er serien «Skiftninger». Alle skulpturane i serien er laga av poppeltre frå Olavshaugen på Stiklestad Nasjonale Kultursenter. Her spelar historia til materialet ei viktig rolle i måten verka vert opplevde på.

Gunhild Vegge og Lasse Kolsrud: «Kiempers fødeland»

Haugesund kunstforening

21. september–14. oktober

Grafikarane Gunhild Vegge (f. 1960) og Lasse Kolsrud (f. 1959) stiller gjerne ut saman. Her viser dei seriane «Kiempers Fødeland: Utfoldelse i friluft» og «Kiempers fødeland: 1814–?». Her kastar kunstnarane skråblikk på den (sær)norske trongen til å boltre seg i naturen. Motiva inneheld rikeleg med humor og ironi på eigne så vel som andres vegne. Tresnitta i serien «Kiempers Fødeland: 1814–?» vart utarbeidde i samband med grunnlovsjubileet i 2014 og tek utgangspunkt i viktige hendingar dei seinaste 200 åra.

Karin Blomgren og Irene Nordli

Bodø Biennale

Bodø Kunstforening
og Stormen bibliotek

9. september–21. oktober

Bodø Biennale er ein festival for både visuell kunst og dansekunst. Dei to kunstnarane som er inviterte til festivalutstillinga, er keramikarane Karin Blomgren (f. 1987, Stockholm) og Irene Nordli (f. 1967, Lørenskog). Dei har laga verk spesielt til ulike stader i Bodø. I tillegg har Blomgren utstilling i Bodø kunstforening og Nordli i Stormen bibliotek.