I morgon vert den amerikanske låtskrivaren og artisten John Hiatt 70, og vi klinkar til med tre låtar frå det som har vorte ein omfattande katalog:

Med Crossing Muddy Waters (2000), mannens femtande album, fekk lyttarar eit møte med ein annan Hiatt enn dei var vande med. Sjekk tittelsporet for å få ein smak av korleis det høyrdest ut då han reindyrka eit heilakustisk americanauttrykk med meir enn nokre få dropar bluegrass i seg.

På somme måtar peikar dette albumet fram mot det som kom i fjor, nemleg Leftover Feelings, som Hiatt laga saman med The Jerry Douglas Band, og som fleire meinte vitna om ein revitalisert artist. Musikken vart spelt inn i legendariske RCA Studio B i Nashville, og kanskje inspirerte rommet gjengen – vi vel oss «Mississippi Phone Booth» som smakebit.

Eg har høyrt Hiatt på scenen berre éin gong, og det var hausten 1993, året han gav ut det solide, streite rockealbumet Perfectly Good Guitar, som prega repertoaret. Songen eg hugsar best frå den kvelden, er likevel hans mest kjende, som han med gode grunnar sjeldan lèt vere å spele på konsert: balladen «Have a Little Faith in Me», frå framifrå Bring the Family (1987), der han hadde med Ry Cooder, Nick Lowe og Jim Keltner, fire karar som seinare skulle gi ut ei plate saman med bandnamnet Little Village.

Øyvind Vågnes