«My name is Prince, and I come to play with you.» Med dei orda opnar Live in Syracuse, March 30, 1985, før artisten, som vart fødd Prince Roger Nelson (1958–2016), og bandet The Revolution kastar seg ut i «Let’s Go Crazy», i eit konsertopptak som rommar ganske nøyaktig det platetittelen lovar. Trøkket er stort frå første tone og held seg slik heile vegen, fram til dei nesten tjue minutta det krev å framføre det tjuande sporet på denne utgivinga, avslutningssongen «Purple Rain».

Det var nokre veker seinare på våren i 1985 at Around the World in a Day kom ut, på eit tidspunkt då Prince var på veg inn i dei sterkaste åra i karrieren – Purple Rain kom ut sommaren før, Parade (1986) og Sign o´ the Times (1987) skulle følgje. Mannen var i ferd med å bli eit popikon, med ein eksplosiv popularitet.

Purple Rain låg øvst på Billboard-lista heile hausten 1984. For denne lyttaren er kvelden i Syracuse mest av alt ei påminning om kva fenomenalt band Prince hadde i The Revolution: Her er Wendy Melvoin (gitar) og Lisa Coleman (tangentar) på plass, og Mark Brown (bass), Matt Fink (tangentar) og Bobby Z. (trommer), og i dette tilfellet er det vesentleg å nemne at alle også er med og syng. For ein gjeng!

Øyvind Vågnes