Rock

Amigo the Devil:

Everything is Fine

Regime Music Group

«Life is a joke,» syng Amigo the Devil i den åttande låten på ferske, ironisk titulerte Everything is Fine, «and death is the punchline».

Eit slikt svartsyn gjer seg ikkje gjeldande berre i songen med den talande tittelen «Hungover in Jonestown», men her, som i mykje av det andre materialet på albumet, finst det små, umiskjennelege dosar med mørk humor også.

Vik ikkje

At mørk humor er ein vesentleg ingrediens, vart også tydeleg då eg høyrde Danny Kiranos – mannen som skjuler seg bak artistnamnet Amigo the Devil – i Nashville-klubben Mercy Lounge førre veke. Gøymt i den gotiske rockens tidvise nihilisme ligg det ein eigen katarsis. Folk i salen tralla med på «lalala» i «Hungover in Jonestown», og Kiranos-gjengangaren «I Hope Your Husband Dies» kalla fram allsong. Mellom den skjeggete og langhåra Kiranos’ mange tatoveringar kunne vi sjå ein øldrikkande Gud utstyrt med ein iPod.

Everything is Fine er ein ganske dempa affære, men ikkje akkurat blodfattig, trass i det relativt høge blodtapet i songane. På plata, som på scenen, løftar Amigo the Devil fram ein banjo, og han stirer deg hardt i auga med songar som ikkje vik blikket. Opningssporet «Cocaine and Abel» er klassisk eksistensiell americana, med anger, mismot og lengt etter forsoning som sentrale motiv.

Solid låtmakar

Dabby Kiranos er ein solid singer-songwriter, og gjer det meste sjølv, medan enkelte musikarar gjestar på bass, trommer og slidegitar. Når dei dirrande, elektriske gitarane får følgje i lagnadstunge «You’re Perfect Too», er det av ein kledeleg mariachiaktig trompet ved Matt Mattera. Fem av spora er styrkte med ein strykekvartett.

Ein song som «Preacher Feature» kler seg ut som countryballade i Cash-terrenget, og i «The Dreamer» kling Hank Williams’ monumentale einsemd med i verselinene. Kiranos har fortalt i intervju at han kjøpte banjoen etter eit innfall i fylla, nesten som ein vits. Etter den natta fann han ein ny veg inn i musikken.

Vi er langt utanfor allfarveg når vi finn fram til Everything is Fine, men det er også noko av det som gjer plata forfriskande – dette er songar som har blitt til over tid, og Kiranos er ganske kompromisslaus i sin eigen vri på nokre av folktradisjonens mørkaste forteljingar og tropar. Så får heller dei meir veikhjarta lyttarane der ute setje på noko anna.

Øyvind Vågnes

Øyvind Vågnes er forfattar og fast musikkskribent i Dag og Tid.