Rock

Perfume Genius:

Ugly Season

Matador / Playground

Med «Teeth», det tredje sporet på Ugly Season, har Perfume Genius laga det som for meg står som nokre av dei finaste minutta med musikk i 2022. Mest av alt er songen merkt av røysta til Mike Hadreas, som kjem heilt under huda og her får utfalde seg over eit vart klokkespel som etter kvart vert forløyst i eit elegant orkesterarrangement. Det dreier seg om pop på sitt mest inderlege, med subtile og komplekse klangbotnar.

Det var med No Shape (2017) eg først fekk auga opp for Perfume Genius, eit album som utforska kjønnsidentitet og tok tradisjonelle kjønnsroller opp til diskusjon på friskt vis, gjennom ein miks av gamle og nye tropar i den nordamerikanske populærmusikalske tradisjonen.

Smalt og breitt

Hadreas er ein type artist som når smalt og breitt om kvarandre – han fyller sveitte, små klubblokale før han dukkar opp på mainstream-TV om kvelden, hos Kimmel, Colbert og Fallon. Musikken samla på Ugly Season er skriven og komponert til koreografen Kate Wallichs danseførestilling The Sun Still Burns Here, som vart framført i Seattle, Minneapolis, New York og Boston i 2019. På den tida sleppte Perfume Genius frå seg eit par smakebitar, «Pop Song» og «Eye in the Wall», låtar som – i likskap med den kanskje mest kjende songen til artisten, «Queen» – viser eit godt grep om det fengjande, det dansbare. Hadreas kan det å skru saman ein hit om han vil.

Nye sider

Desse songane representerer likevel berre éi side av rike Ugly Season, som andre stader nærmar seg den instrumentale samtidsmusikken («Just a Room», «Scherzo»), og rommar ei ny breidde i uttrykket til Perfume Genius. Arbeidet vitnar om ein artist som heile tida er på utkik etter å finne nye sider av seg sjølv og som også har ein skarp teft for samarbeid på tvers, gjerne utanfor musikken.

Med Ugly Season følgjer ein kortfilm regissert av kunstnaren og regissøren Jacolby Satterwhite, som er kjend for eit audiovisuelt uttrykk som blandar livevideo, 3-D-animasjon, teikning og trykk. Kanskje kan ein seie at det han lagar, og det Hadreas lagar, speglar kvarandre, og utfyller kvarandre, på fascinerande vis, i eit kunstnarleg møte som vitnar om eit auge for det hybride og det performative.

Denne våren har Perfume Genius turnert i USA og Canada, og rapportane fortel om ein gåverik sceneartist med ei set list som byr på tett med høgdepunkt, særleg frå strålande Set My Heart on Fire Immediately (2020). På seinsommaren legg han ut på europaturné, og først kjem han til Øyafestivalen – det bør bli eit høgdepunkt den kvelden.

Øyvind Vågnes

Øyvind Vågnes er forfattar og fast musikkskribent i Dag og Tid.