Kunstpop

Julia Holter:

Aviary

Domino / Playground

Korleis står det til med menneskesinnet i ei verd som smeltar? Går det an å skildre det i ord og tonar? Det er i alle fall verdt eit forsøk, meiner Julia Holter, som omtaler den nye plata Aviary som «the cacophony of the mind in a melting world».

Fleire lesarar vil kjenne Holters ambisiøse plateproduksjonar, sist Have You In My Wilderness (2015) – også meld på desse sidene. Kvart album er eit gjennomtenkt, konseptuelt orientert verk som vekslar mellom komplekse låtstrukturar og ganske «rett på» – om enn sofistikert arrangerte – popsongar.

Inspirasjon

Utgangspunktet for Aviary er typisk Holter. Eit sitat frå ei novelle (2009) av den libanesisk-amerikanske forfattaren Etel Adnan har inspirert tittelen: «I found myself in an aviary full of shrieking birds.»

For Holter er eit slikt fuglehus ein passande metafor for den larmande verda ho ser rundt seg i 2018, som skrik mot henne med politiske skandalar og naturkatastrofar – ein ofte desorienterande, splittande kakofoni.

Tett på

Mot denne framandgjerande kjensla står ein musikk som eksplisitt appellerer til det menneskelege i oss. Slik, kan ein seie, er Holters etikk, han får form i eit musikalsk uttrykk som uredd dreg frå vidt forskjellige kjelder, der nye samanhengar oppstår, mellom det stringente i den klassiske musikktradisjonen, det frie i jazzen og idérikdommen i både den klassiske litteraturarven (Dante) og den rikt tilgjengelege globale litteraturen frå vår eiga tid (Adnan).

Mannskapet på Aviary er tett på Holter: Her er Corey Fogel på perkusjon, og med sitt virtuose basspel kan Devin Hoff minne om bassisten vi kjenner frå så mange Kate Bush-plater – ein viktig referanse i Holters katalog, og også her, som i ein låt som «Words I Heard» – nemleg John Giblin.

Holters synthar blandar seg fint med eit markant strykeensemble, med Dina Maccabee på fiolin, bratsj og vokal, Sarah Belle Reid på fiolin, Andrew Tholl på fiolin. Tashi Wada er også med – på både synth og sekkepipe. (Høyr til dømes på «I Shall Love 1».)

Aviary er nær, for så å opne opp for ein høgare himmel, og for dei som tek ein lytt, men i første omgang synest det er for sært, har eg berre ein ting å seie: Prøv éin gong til – og prøv litt hardare.

Øyvind Vågnes

Øyvind Vågnes er forfattar og fast musikkskribent i Dag og Tid.