Barnebok

Ragnar Aalbu:

Hakk o ve

Ena forlag /
Vigmostad & Bjørke

Sjølv om kvalitetstid kring ei god barnebok er idealet for samvitsfulle småbarnsforeldre, er realiteten ofte aleinetid bak kvar sin skjerm.

Prøv Ragnar Aalbus nye biletbok neste gong fjernkontrollen freistar. Dra minsten opp i fanget, men hopp over tittelbladet. Det vil han ikkje forstå mykje av. Sjølv smiler du av ordspelet hakk o ve straks du ser hakkespetten hos dokteren på første oppslag.

Hakkespetten har fått vondt i hovudet av all hakkinga, han må slutte å hakke. Han bør heller ikkje fly på ei stund. Han må finne på noko anna.

«Du som er ung har jo både tid og muligheter. Selv om tiden flyr», seier doktoren. Tok du den? Det gjorde du nok. Klisjear er verre for den vesle på fanget.

Moldvarpen er lettare å skjøne, og minst like morosam: Han føreslår graving. Det er graving som er greia no, meiner han.

Her er moro på mange nivå, også i dei vakre, detaljrike og leikne illustrasjonane. Delar av språkleiken krev mange års røynsle med ord og vendingar for å skjøne.

Du er eldst og kjem til å le mest, men språkgleda vil barnet bli smitta av og strekke seg etter.

Kvardagsmirakelet som skjer når du legg bort telefonen fordi du har lyst til å lese boka for barnet ditt, er verdt kvart skot over hovudet på barnelesaren frå Ragnar Aalbu.

Når du les, kan du tilpasse og forklare. Dersom desse intelligente vitsane og morosame dyra til Aalbu fell i smak, er det meir å hente. Han har mange bøker med denne miksen.

Janne Karin Støylen

Janne Karin Støylen er bonde og litteraturvitar.