Den Nationale Scene, Lille Scene

Line Knutzon og Jens Hellemann (komponist):

Gitaristene

Omsett av Cathrine Telle og Kjersti Fjeldstad
Regi: Cathrine Telle
Musikalsk ansvarleg: Bjørn Willberg Andersen

Den danske dramatikaren Line Knutzon har gjeve grokraft til mange originale teaterhendingar dei siste 20 åra.

Stykket Gitaristene, som Den Nationale Scene no speler, søker å gi eit innblikk i eit litt slite musikarunivers.

Arrogant haldning

Diverre klarer korkje teksten eller framføringa å formidle noko truverdig. Ein får faktisk kjensla av ei arrogant haldning til eit visst miljø og ei viss musikkform. Karakterane er flate og klisjéaktige, og låtane dei syng, verkar som vondsinna parodiar på heimesnikra nachspielviser. Det er nok meininga vi skal le, men det er ikkje morosamt i seg sjølv at ein song er dårleg. Nei og atter nei!

Dette er ikkje dei fire skodespelarane si skuld. Alle syng og trakterer gitarane riktig så bra, og dei gjer mange heiderlege forsøk på ærleg og ekte skodespel. Men finst det nokon skodespelarar i verda som kunne berge dette? Eg trur ikkje det.

God idé

Utgangspunktet for stykket er at ein velkjent visepopartist er død, og ein gjeng vener av han møtest for å øve inn eit knippe av låtane hans til minnestunda. Ideen er for så vidt god. Det er ikkje godt å seie kor mykje som er att av Line Knutzons originaltekst, men slik stykket vert spelt i Bergen, er det langt mellom dei spenstige drammane.

Det er sjeldan interessant, og det er svært sjeldan vittig. Men det alvorlegaste er at stykket verkar nedlatande overfor folkekulturen og frir til åndssnobberiet.

Danskane har på mange måtar ei rausare innstilling enn oss når det gjeld høg- og lågkultur. Det er ikkje alt dansk som verkar like bra i Noreg. Sånn er det berre.

Bent Kvalvik

Bent Kvalvik er filmarkivar og fast teatermeldar i Dag og Tid.