Plateboksar med karriereperspektiv vert stadig ekspanderte. Dette er også tilfellet med Glen Campbells Legacy, opphavleg utgitt i 2003, som ikkje har vore lett å få tak i på ei stund. I sommar kom nemleg Legacy 1961–2017, som strekkjer seg tilbake til året då Campbell platedebuterte, og fram til året då han gjekk bort. Heile 78 spor er det plass til på det som må kunne kallast ei svært bilturvennleg samling: Er ikkje ikoniske låtar som «By the Time I Get to Phoenix» (1967), «Wichita Lineman» (1968) og «Rhinestone Cowboy» (1975) som skapt for motorvegen?

Koplinga vert stadfesta når rockens bilpoet nummer éin, Bruce Springsteen, refererte til Campbell som ei sentral inspirasjonskjelde til sommarens mjuke gåvepakke av eit album, Western Stars. Springsteen figurerer elles i dokumentaren Glen Campbell: I’ll Be Me (2014), som også fortalde om Campbells kamp med Alzheimers sjukdom (som han vart diagnostisert med i 2010). Legacy 1961–2017 teiknar eit rikt bilete av artistens songskatt, for både gamle og nye lyttarar.

Øyvind Vågnes