Denne vårens New Orleans Jazz & Heritage Festival var ei jubileumsutgåve, for no har festivalen gått av stabelen i eit halvt hundreår. Nesten ein halv million menneske var med i Louisiana i mai, men for alle oss som ikkje kunne ta turen til denne omfangsrike musikkfesten, er den nye boksen frå Smithsonian Folkways, Jazz Fest: The New Orleans Jazz & Heritage Festival, ei herleg trøyst.

Det dreier seg om ei fargesprakande sak, med ei fin bok og heile fem diskar flott innpakka. Som Tom Moon i NPR seier i ein omtale av utgivinga: Å orientere seg i dette materialet er litt som å vandre rundt på den eklektiske festivalen, der det ofte kokar på fleire plater på ein gong. For på denne boksen er ikkje stoffet organisert etter kronologi, sjanger eller liknande haldepunkt. Slik får også sentrale aktørar – som Dag og Tid-favoritt Allen Toussaint­ – dukke opp i fleire ulike konfigurasjonar, her og der, akkurat slik det må vere.

Særleg prisverdig er fokuset på det lokale og det regionale. Festivalen har ikkje mangla verkeleg store namn, av typen Springsteen, men dei får boltre seg godt i andre samanhengar enn her. 2019 vart våren då Dr. John gjekk bort – han dukkar sjølvsagt opp her, omgitt av kulturen som skapte han, og som han var med på å skape.

Øyvind Vågnes