Nokre minutt etter at Ry Cooder hadde gått av scenen på bluesfestivalen på Notodden, leverte Knut Reiersrud Band ein forrykande nattekonsert i same telt. Høgdepunktet kom då Reiersrud bestemte seg for å gjere eit strengeskifte midt i «I Can’t Stop» (frå Soul of Man, 1998), og laga show av å stemme gitaren i ein solo – heilt rått.

Då eg i vår etterlyste 25-årsjubileumsfest for Reiersrud-klassikaren Tramp (1993) på desse sidene, gjorde gitaristen meg merksam på at ein slik faktisk skal komme – og det skjer i kveld, under Telemarksfestivalen i Bø, der musikarane som laga albumet, heldt konsert for eit kvart hundreår sidan, før turen gjekk til Rauland for å lage plate.

Tramp var Reiersruds solodebut, og han samla vestafrikanske musikarar, gospelkvintetten Five Blind Boys of Alabama og norske kremmusikarar i eit fascinerande musikalsk møte. Til kveldens konsert har Reiersrud med seg Alagi M’Bye, som tek med kora og kjem med fly frå Gambia – eg får framleis gåsehud når eg tenkjer på vokalen hans på «Jarabe». Paolo Vinaccia stiller på trommer, Audun Erlien på bass, Sidiki Camara på perkusjon og kora og Mathias Eick på trompet. For ein fredagskveld!

Øyvind Vågnes