Verdsturneen til Roger Waters i 2017–2018 følgde Is This The Life We Really Want? (2017), det første studioalbumet frå den kanten sidan Amused to Death (1992), og ei verkeleg vital utgiving som eg på desse sidene drista meg til å kalle «det beste Pink Floyd-albumet sidan tidleg på 1980-talet». Waters hadde fått med seg Nigel Godrich (Radiohead) som produsent, og sentral var også Jonathan Wilson, som etterpå vart med på turneen, der han tok plassen til gitarist David Gilmour i framføringa av gamle Floyd-klassikarar.

Ein må kunne kalle turneen ein kunstnarleg og kommersiell suksess, med sine 156 konsertar og 2,3 millionar publikummarar. Waters fekk mykje merksemd for det spektakulære, multisensoriske sceneshowet, med si teatralske, markant audiovisuelle utforming.

Eit opptak flimra frå NRK-skjermen i vår ein gong, men no vert konsertfilmen Roger Waters: US + THEM lansert, som plate og som film (med regi av Sean Evans og Waters sjølv). Kanskje vil somme seie at lydsporet knapt trengst, sidan Floyd-skatten alt finst i rikelege versjonar, men dette opptaket kjennest spist og ferskt, og er noko anna enn gammal hermetikk. Ein ny låt som «Picture That» står ikkje tilbake for det gamle materialet, den nye versjonen av «The Great Gig in the Sky» er formidabel og annleis, og «Dogs» er endå betre her enn han var på Animals (1977), ikkje minst takka vere Wilson på vokal og gitar. Sterke saker, altså, frå Waters – som for nokre veker sidan fylte 77 år.

Øyvind Vågnes