For dei som vil orientere seg mot rock, pop, blues, og country som lesarar, med eit blikk mot både det nye og det gamle, det aktuelle og det historiske, er det lett å gripe til eit britisk musikkmagasin i møtet med norske kioskhyller – ikkje minst om du også vil følgje med på det som skjer i USA.

Men det finst alternativ, og somme av dei har rett mykje å by på. Få eg kjenner, har fått opp auga for strålande The Oxford American, som rett nok ikkje eksklusivt er eit musikkblad, men som har bydd på mykje framifrå musikkskriving frå og om dei amerikanske sørstatane sidan det vart stifta i 1992, i Oxford i Mississippi, av Marc Smirnoff.

Ein titt innom nettsidene vil gi deg eit bilete av breidda og djupna, men ein endå betre måte å få ein smak på, er å skaffe seg The Oxford American Book of Great Music Writing (2012), redigert av Smirnoff, som samlar høgdepunkt frå den rike bladhistoria. Boka er rett og slett framifrå, med tekstar om Leadbelly, Bessie Smith, My Morning Jacket, Jim White, Dusty Springfield og Captain Beefheart, for å nemne ein litt tilfeldig brøkdel. Mellom favorittane mine finst Joe Saccos teikneserie «Portrait of the Artist as an Aging Lightnin’ Hopkins Enthusiast». Og kor mange bøker kan by på eit føreord av Van Dyke Parks?

Øyvind Vågnes