Will Oldham, som er god med hundane, om vi skal tru ferske pressefotografi frå den kanten, har i år samla meir enn 200 songtekstar og gitt dei ut i bokform, i Songs of Love and Horror (W.W. Norton), som også er rikt utstyrt med kommentarar og notar frå forfattaren.

No har kompendiet fått eit fint album til følgje. Songs of Love and Horror (Domino) byr på akustiske tolkingar av sentrale songar i Oldhams produksjon og eit par overraskande godbitar.

Her er til dømes «I See a Darkness» nok ein gong, songen ikkje minst Johnny Cash gjorde ein ugløymeleg versjon av, og jammen om ikkje Oldham klarer å gjere noko nytt med låten. Han er åleine med gitaren på Songs of Love and Horror, og når desse songane er tømde for noko anna enn det heilt grunnleggjande, står dei fram med rein, klar tyngde. Fleire vil nok få assosiasjonar til Master and Everyone (2003), som her er representert med nydelege «The Way.» Mellom dei meir kuriøse innslaga finst ein a cappella-vri på «Strange Affair», ein nøkkelsong på Richard og Linda Thompsons First Light (1978). Det seier litt om Oldham som vokalist at han maktar å gjere låten til sin eigen.

Øyvind Vågnes